Ri kalaning pangelong ping 14 sasih kapitu iraga sareng sami nyanggra rerainan sane mawasta Siwaratri. Siwaratri sane maartos wengin Ida Batara Siwa mateges wengi utama mabakti ring batara Siwa. Kruna Siwa mawit saking kruna basa Sanskerta sane maartos sang mapakayunan becik, seneng ngampurayang, tur ngicenin bagianing urip. Raris batara Siwa wantah pesengan Ida Sang Hyang Widi rikala ida mrelina sahananing mala papa mangda sida dados suci nirmala. Wengi taler mateges peteng. Peteng deriki mateges kapetengan kayun. Dadosne Siwaratri mateges wantah peteng (wengi) galah nglebur utawi mrelina kapetengan kayun nuju margi galang apadang.
Ri kalaning iraga nyanggra rerainan Siwaratri manut sastra agama kapatut pisan iraga nglaksanayang Brata Siwaratri. Brata maartos janji, sumpah, taler kateguhan kayun. Brata Siwaratri maartos janji utawi kateguhan kayun nglaksanayang ajah-ajahan Siwaratri mangda sida molihang waranugrahan Ida Sang Hyang Siwa.
Brata Siwaratri sane patut kamargiang ri kala nyanggra Siwaratri utamannyane upawasa, monabrata, jagra. Upawasa mateges mapuasa nenten ngajeng ngawit pk. 06.00 (semeng galang tanah) ring panglong ping 14 rauh pk. 18.00 (sandikala) ring tileming sasih kapitu utawi salami 36 jam. Raris monabrata artinnyane nenten ngraos utawi mamona suwennyane pateh ring upawasa. Sapunika taler jagra sane mateges enten, nenten sirep, utawi matangi ten sirep-sirep saking pk. 06.00 panglong ping 14 rauh pk. 18.00 tilem kapitu. Sapunika patutne iraga nyanggra rerainan Siwaratri manut sastra agama. Yening nenten sida antuk ngamargiang maka tatiga brata Siwaratri punika, sanistane patut ngamargiang brata pajagran (nenten sirep salami 36 jam).
